[MASBATENYO TRANSLATION]
Kamatuodan sa FOI
Kami an LAWÔD – usad na grupo san mga organisasyon san mga Masbatenyo na nagaadal yana sa University of the Philippines Diliman sa Quezon City, sa Bicol University sa Legazpi City, Albay kag sa Silliman University sa Dumaguete City. Tanan kami nagapanamgo – an pag-uswag san Probinsya san Masbate.
Sadto pa man, nakita na namon kun pano nagtangis kag nagpakalisod an mga Masbatenyo para sa kaayuhan san Masbate. Kada tulo ka tuig, pirmi na lang namon kinabutang sa posisyon an mga liderato na dapat unta sinda an nagapadayon san kauswagan san amon probinsya. Guinhatagan namon sinda san amon tiwala. Guinhatagan namon sinda san boses. Guinhatagan namon sinda san awtoridad. Pero nano an nangyari? Nabubuhay kami na bagan waran nagbag-o. Dili pa gayud namon batyag an pag-uswag.
Oo, damo nan pagbabag-o. May mga bag-o na aktibidades, mga bag-o na kamino, mga bag-o na waiting shed, mga bag-o na basketball court, mga bag-o na classroom, kag mga bag-o na conference halls. Sabiha lang. Bagan kadamo man gayud san bag-o. Pero nano kay kun kitaon gayud san maayo ini na mga proyekto, bagan mas mahal pa sinda sa matuod ninda na presyo? Nano kay kun igwa pa san guinapangayo na mga dokumento sani na mga proyekto, wara man lang sinda san maihatag na maski dyutay na report? Kag an mas mabug-at pa, nano kay kun may igwa san guinapangayo na maski nano na record, an amon gobyerno kay kadugay-dugay maghatag san aksyon? Kag may mga oras pa na wara gayud ninda pakiarami?
Dugay na kami nagaparahunga, pero ada lang guihapon ini na mga hunga – wara guinpakiarama kag wara guinhatagan san sabat. An pirmi lang namon nababaton sa inda kay mga waran klaro na palusot kag mga buwa. Sobra-sobra na. An amon probinsya kay sobra-sobra na an guin-agihan. Tama na.
Pero syempre, ini na amon panawagan kay dili lang para sa amon probinsya. Kay kami estudyante na hali sa paiba-iba na eskwelahan, nakita man namon kun pano an iba na parte san aton bansa an nakadanas man san pareho kaibahan na mga pangyayari. Kag kami, habo man namon na madanasan ini utro sa maabot na panahon.
Nagatuod kami na igwa pa san pag-asa.
Sani na ika-24 san Nobyembre, 2014, sa pagdeliberate san Committee on Public Information san House of Representatives san consolidated Freedom of Information (FOI) Bill, kinapakusog pa namon an amon panawagan para sa transparency kag accountability sa goberyno. Guinapanawagan namon an aton mga kongresista kag senador na iudong na an pagapadugay san mga karapatan na dapat guinatamasa na san mga Pilipino sadto pa – an karapatan naton sa freedom of information. Guinapangayo man namon an pansin san mga kongresista na hali sa amon probinsya – sinda Marvi E. Bravo san una na distrito, Elisa “Olga” T. Kho san ikaduwa na distrito, kag Scott Davies S. Lanete san ikatulo na distrito, na suportahan man unta ninda ini na amon panawagan.
Gusto namon an kamatuodan.
Siyak namon tanan, FOI now!
No comments:
Post a Comment